Vakansie

Jean Meiring

Ons weg hierheen verlede jaar was nuut en ongebaan:
Ek het jou met kussings en kateter agter sitgemaak.
Dokter het kop geskud; ons tog maar laat begaan:
Hy’t goed geweet - tuis sou jy ook nie beter raak.
Was dit die eerste keer dat jy nie, in pers paisley,
die strand soos ’n hertogin betree? Met arms van brons
tot by die bewierde boei uitswem? Was dit nie
toe so goed soos die dood vir jou? Vir ons?
Nou sit ek allenig hier, ingegrawe in jou stoel,
en tuur oor hemeldonker see en silwer sekelstrand,
waar ons, as jong verliefdes, vir die eerste keer kon voel
hoe aai die wind ons groot geluk, met ’n kil en koue hand.
Nou’s jy een van die skulpies deur dié wrede plek verloën,
skitter jy so skerp soos eensaamheid in Neptunus se kroon.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.