Karoo

Lise Smit

Môre
As die son opkom keer ek terug
na die land van my herkoms
waar ek nog nooit was nie.
Miskien is daar nog gene in my agterbrein
wat by die reuk van aarde
geheuebeelde sal wakkermaak
wat behoort het aan ’n voorsaat
met vlees van growwe brood
en vel so glad soos ’n kleioond.

Vandag
Ek het gewas in ’n blikbad
vere in my hare gevleg.
Slegs bossies het my geskei van die
omsirkelende ooptes.
Ek het aan die slaap geraak tussen klipmure
wat skei van bobbejaan se roep en die gesuis van stilte
gelees by kerslig
geswem in poeierwater
kaalvoet geloop oor marmergladde rotsbanke.
Rou sonlig het my bleekheid laat verdamp.

Gister
Maar al het my geraffineerde liggaam
die droogte soos ’n spons ingetrek
vind ek dat my horison van herinnering
steeds net tot my stadsgeboorte strek.

terug    /     boontoe

© Kopiereg in die ontwerp en inhoud van hierdie webruimte behoort aan LitNet, uitgesluit die kopiereg in bydraes wat berus by die outeurs wat sodanige bydraes verskaf. LitNet streef na die plasing van oorspronklike materiaal en na die oop en onbeperkte uitruil van idees en menings. Die menings van bydraers tot hierdie werftuiste is dus hul eie en weerspieël nie noodwendig die mening van die redaksie en bestuur van LitNet nie. LitNet kan ongelukkig ook nie waarborg dat hierdie diens ononderbroke of foutloos sal wees nie en gebruikers wat steun op inligting wat hier verskaf word, doen dit op hul eie risiko. Media24, M-Web, Ligitprops 3042 BK en die bestuur en redaksie van LitNet aanvaar derhalwe geen aanspreeklikheid vir enige regstreekse of onregstreekse verlies of skade wat uit sodanige bydraes of die verskaffing van hierdie diens spruit nie. LitNet is ’n onafhanklike joernaal op die Internet, en word as gesamentlike onderneming deur Ligitprops 3042 BK en Media24 bedryf.